Өңірімізде «Қазақстан халқына» қоғамдық қоры мамандарының қатысуымен баспасөз туры ұйымдастырылды. Іс-шара барысында бұқаралық ақпарат құралдары өкілдері қордың қолдауымен салынған әлеуметтік нысандарды аралады.
2022 жылдан бастап қор тарапынан облысқа 17,8 млрд. теңгеден астам қаржы бөлініп, бірқатар ауқымды жобалар жүзеге асқан. Олардың дені білім беру саласына тиесілі.
Журналистер ат басын бұрған алғашқы мекеме – Қызылжар ауданындағы №2 Бескөл орта мектебі. Қордың «елді мекендердегі тірек мектептерді дамыту» жобасы аясында білім ошағы заманауи кабинеттерімен жабдықталыпты. «Білім ордасындағы мектепалды даярлық пен робототехника, мультимедия, физика және химия пәндері кабинеттері, STEM зертханасы – оқушылардың таным көкжиегін кеңейтіп қана қоймай, жаңа дағдылар мен тәжірибелерді меңгерулеріне мүмкіндік беруде. Қор осы мақсат үшін 250 млн. теңге қаржы бөлді. STEM үлгісіндегі оқыту мектеп түлектерінің бәсекеге қабілеттілігін арттырады. 3D принтер, лазерлік станоктар, көпфункционалды дрон және т.б. қамтитын жаңа жабдықтардың арқасында балалар өз идеяларын сәтті жүзеге асыра алады», – дейді «Қазақстан халқына» қоры жанындағы бағдарламалар мен жобаларды басқару жөніндегі орталықтың басшысы Бауыржан Оразғалиев.
Облыстық білім басқармасының басшысы Айнагүл Сұрағанованың айтуынша, бүгіндері ауылдардағы мектептердің басшылары мен мұғалімдері Назарбаев зияткерлік мектебі мен педагогикалық шеберлік орталықтарында жаңартылған оқыту бағдарламасы бойынша біліктілікті арттыру курстарынан өтуде. Бұл өз кезегінде қалалық және ауылдық мектептер арасындағы оқыту алшақтығын қысқартуға сеп болмақ.
Қордың ауылдық мектептердің әлеуетін дамытуға бағытталған жобасына биыл облыстағы 39 шағын жинақты мектеп тартылып, олар заманауи құралдармен жабдықталған. Сондай-ақ мектептерді жоғары жылдамдықты интернетке қосу мәселесі де шешімін тауыпты. Жобаның жалпы құны – 990 млн. теңгеге жуық.
Баспасөз турында қор тарапынан биыл өңірде 3 тірек мектеп салуға қаржы бөлінгені туралы айтылды. Жобаны жүзеге асыру үшін жергілікті бюджеттен қосымша 750 млн. теңге бағытталған. Бұдан бөлек, ерекше білім беру қажеттіліктері бар балаларға арналған 98 арнайы мектепті жабдықтау жұмыстары аяқталды. Облыстағы 7 арнайы мектеп жалпы құны 163,05 млн. теңгеге жабдықталыпты.
Қордың менеджері Жанара Алкенованың айтуынша, бүгінде облысымызда аталмыш ұйымның қолдауымен 50-ден астам әлеуметтік маңызы бар бағдарлама қолға алынған. Оның бірқатары толықтай жүзеге асырылып, өз нәтижесін беріп отыр. Аталған бағдарламалардың бір бағыты денсаулық сақтау саласын қамтиды. Оның аясында емдеу мекемелеріне қажетті жабдықтар алу, науқастарды дәрі-дәрмекпен қамту, сырқат балаларды оңалтуға қолдау көрсету сияқты жұмыстар атқарылуда. «Қатерлі дертке шалдыққан және созылмалы аурулары бар 26 пациент жалпы көлемі 3,2 млрд. теңге болатын дәрі-дәрмекпен қамтамасыз етілді. Онкологиялық науқастар есебінде тұрған 84 азаматты дерттерінен айықтыру үшін 1,25 млрд. теңге бөлінді. Одан бөлек, қан-тамыр потологиясы бар 2 балаға жалпы көлемі 320 мың теңге болатын дәрі-дәрмектік терапия тағайындалды», – дейді маман.
Облыстық денсаулық сақтау басқармасының басшысы Сәкен Амрин өңірдегі бірқатар емдеу мекемесіне офтальмотологиялық скринингке, шала туған нәрестелердің ретинопатиясын емдеуге арналған жабдықтар жеткізілгенін айтты. «Көпсалалы облыстық ауруханаға» жалпы құны 4 млн. теңге болатын офтальмотологиялық жабдықтар сатып алынды. Ал «Көпсалалы облыстық балалар ауруханасына» орнатылған нейрохирургиялық жабдықтың құны 63,8 млн. теңге тұрады», – дейді Сәкен Өмірсерікұлы.
Тілшілер қауымы қордың қолдауы негізінде Петропавл қаласында ашылған Ерте араласу орталығына барды. Қордың «Аудандық оңалту орталықтары» қайырымдылық жобасы аясында өңірлерде тағы 6 оңалту орталығын ашу жоспарланып отыр. Әр орталықты жабдықтауға 241,2 млн. теңге қаржы бөлінеді.
Әлеуметтік осал топтарды қолдау бойынша да ауқымды жұмыстар атқарылып жатыр. Облыс бойынша 6 азамат инновациялық оңалту құралдарымен (протездермен) қамтамасыз етілген. Бұл мақсатқа 50, 4 млн. теңге бөлінді.
Қор табиғи және техногендік сипаттағы төтенше жағдайлар салдарынан зардап шеккендерге көмек көрсету бағытында да ауқымды жұмыстар атқарды. Осыдан екі жыл бұрын су тасқынынан зардап шеккен өңірлер үшін қаражат бөліп, тұрғын үй құрылысына демеушілік етті. Нәтижесінде 5 өңірдің 20 елді мекенінде 700-ге жуық баспана тұрғызылды. Елімізде тасқыннан зардап шеккендер үшін салынған үйлердің 57 пайызының құрылысын «Қазақстан халқына» қоры қаржыландырды. Өңірлердегі баспаналардың орташа құны – 26,5 млн. теңге. Ал 2024 жылы су тасқыны салдарын жою мақсатында облыстағы 200 үйдің құрылысына 2 млн. 740 мыңға жуық қаражат бөлді. Журналистер баспасөз туры аясында Петропавлдағы жаңадан бой көтерген «Бірлік» шағынауданындағы тұрғын үйлерді аралап көрді.
Шара барысында Бауыржан Оразғалиев спорт саласына да баса назар аударылып, журналистерді өңірде түрлі ауқымды жобалар жүзеге асып жатқанынан хабардар етті. Қордың «100 балалар спорт залы» қайырымдылық бағдарламасы аясында Есіл ауданындағы Покровка ауылында заманауи спорт зал ашылған.
Былтыр қордың қамқоршылық кеңесінің шешімімен 3 жылға арналған «Тұсау кесер» қайырымдылық жобасы бекітілді. Бұл жоба мүмкіндігі шектеулі балалар мен жасөспірімдердің қоғамға бейімделуіне жағдай жасайды.
Толғанай МӘКЕНОВА,
«Soltüstık Qazaqstan».
Суретті түсірген
Шыңғысхан БЕКМҰРАТ.